WASHINGTON, MERKA, AFP.- Merka a bisa djaluna ku México, Guatemala i Honduras a bai di akuerdo pa reforsá seguridat na frontera, meimei di un ola di migrashon ilegal rumbo pa Merka, inkluyendo sifranan rèkòrt di menornan sin kompaño di un adulto.
E asistente spesial di inmigrashon di Konseho di Polítika Nashonal di Kas Blanku, Tyler Moran a bisa ku e tres paisnan a bai di akuerdo pa oumentá e kantidat di patruyanan den zonanan serka di frontera.
Esaki ta evitá ku trafikantenan di persona i kartelnan di droga ta probechá di e situashon i tambe ta protehá menornan ku ta biaha sin kompaño di un adulto òf un miembro di famia. El a agregá ku Biden su gobièrnu ta trahando ku México pa “garantisá ku e pais tin e sistemanan di refugio nesesario pa akohé e migrantenan”.
E bosero di Biden, Jen Psaki a bisa den un rueda di prensa ku e “kompromiso” pa oumentá kontròl a surgi durante diskushonnan bilateral resien i “den kurso di hopi tempu kaba”.
