SANLIURFA, TURKIA, AFP.- Ekiponan di reskate a kontinuá ku e búskeda desesperá di sobrebibientenan relashoná ku e temblor di magnitut 7,8 ku a sakudí sùitost di di Turkia i nort di Siria i laga mas ku 3.800 morto.
Na Turkia, kaminda a registrá a episentro, por lo ménos 2.379 persona a muri segun indikashon di e visepresidente turko, Fuat Oktay. El a añadí ku mas ku 14.483 persona a keda heridá.
Segun Otkay, un total di 7.840 persona a wòrdu saká for di ruinanan i 4.748 edifisio a basha aden. Na Siria e temblor a kousa por lo ménos 1.444 morto.
E friu di wenter a difikultá tareanan di reskate, segun ekiponan involukrá.
E temblor tabatin un profundidat di 17,9 kilometer, segun Servisio Geológiko di Merka (USGS). E Episentro tabata den distrito di Pazarcik, na sùitost di Turkia, 60 kilometer leu di e frontera sirio.
A registrá alrededor di sinkuenta réplika, inkluyendo unu ku un magnitut di 7,5 den e zona nuebe ora despues.
E konteo di víktimanan a sigui empeorá ku kada ora ku a pasa, debí na e kantidat haltu di edifisionan ku a basha aden.
Organisashon Mundial di Salú (OMS) a atvertí na AFP ku e kantidat di víktimanan por ta ocho biaha mas ku e kantidat aktual.
