BOGOTA, COLOMBIA, AFP.- Fiskal di Colombia a kuminsá ku un investigashon djárason, pa aklará denunsianan di un periodista konosí, pa siguimentu i “intimidashon” di su famia, ku segun e, “ta konsekuensia direkto di aktitut” di presidente Gustavo Petro kontra medionan di komunikashon.
E periodista Camila Zuluaga a lesa un karta dirigí na e mandatario den kual e ta konektá nan ku spionahe di su famia. Tambe el a mustra un grabashon di imágennan publiká riba retnan sosial kaminda por mir’é ta kana ku su yu beibi, su kasá i un muhé na su kas.
“Mi ta konfesá ku esaki ta promé biaha ku mi tin miedu di loke por pasa. No pa loke por pasa ku mi, sino pa loke por pasa ku mi famia,” Zuluaga a afirmá.
Segun e periodista, un fanátiko di e mandatario, a publiká e video tokante su bida privá komo un agreshon “ku ta konsekuensia direkto di aktitut” di e mandatario kontra medionan di komunikashon.
Fiskal “a kuminsá e investigashonnan” pa determiná “ken ta tras di e intimidashonnan” di Zuluaga, segun un mensahe di e entidat riba Twitter.
E organisashon no gubernamental Fundashon pa Libertat di Prensa (FLIP) a pidi Petro pa no “ataká periodistanan òf medionan” i a pidié pa “sostené e prensa liber”.
