CARACAS, VENEZUELA, AP.- Citibank di Merka a sera kuentanan di Banko Sentral di Venezuela i di esun estatal, Banko di Venezuela pa motibu di revishon di riesgo. Asina e institushon finansiero a indiká djamars.
Anteriormente, e presidente venezolano Nicolás Maduro a informá ku e kuentanan ta wòrdu será durante 30 dia. Citibank no a presisá esaki.
Banko Sentral di Venezuela i Banko di Venezuela ta usa su kuentanan di Citibank pa pago di transakshon ku klientenan merikano.
Den un komunikado, Citibank a indiká ku a disidí pa “no kontinuá e servisionan di sierto kuenta” siguiendo un “revishon periódiko di riesgo di klientenan venezolano”. E medida lo no afektá solamente e dos bankonan públiko pero tambe algun privá.
E entidat merikano a mustra dispuesto na kontinuá su kompromisonan i relashon ku Venezuela, kaminda esaki tin un filial ya pa 99 aña kaba.
” Nos ta balorá nos diálogo ku gobièrnu i ta spera di por bolbe resolvé e preokupashonnan”, segun e banko. Maduro a atribuí e desishon di Citibank na un ” blokeo finansiero” kontra Venezuela a sostené ku esaki ta forma parti di e “opseshon di e inkisishon di Barack Obama”.
E diputado opositor Jose Guerra a deskartá ku e media di Citibank ta debí na e blokeo finansiero kontra Venezuela i a indiká ku e gobièrnu venezolano a eksponé na oumentá e riesgo finansiero “pa no publiká sifra i datonan ekonómiko kompleto”. Banko Sentral di Venezuela a tarda vários luna ku e publikashon di datonan básiko manera inflashon.
