YAKARTA, INDONESIA (AFP).- Un volkan a drenta den erupshon den un region di seru den nort di Indonesia i a obligá pa algun shen hende pa evakuá e zona despues ku lava i un kolumna sumamente grandi di huma a sali for di e volkan.
“Basando nos mes riba opservashonnan visual i instrumental ku a mustra un oumento dje aktividat dje volkan, ku a subi for di nivel 3 pa nivel 4, a disidí ku momento di evakuashon a yega”, segun un outoridat a bisa.
Outoridatnan tambe a amplia e zona dje krater for di kuater pa seis kilometer.
E seru Ruang, ubiká den e provinsia Septentirional, a drenta den erupshon atardi 13:45 i tabatin otro dos erupshon den mardugá.
No tin reporte di morto ni herido, pero mas di 800 persona a keda evakuá for di dos aldea dje isla di Ruang.
E promé erupshon a konta ku un kolumna di shinishi di dos kilometer di altura i despues e volkan a skupi materialnan te na un altura di 2.5 kilometer.
Indonesia, ku ta konta ku den kareda di 130 volkan aktivo, ku frekuensia ta registrá aktividatnan sísmiko i volkániko.