CARACAS, VENEZUELA (AFP).- E Minister venezolano di Petrolio, Pedro Tellechea, a minimisá e impakto dje sanshonnan norteamerikano riba krudo dje pais karibense, bisando ku e medida ta laga portanan habrí pa lisensianan individual ku ta permití pa konkretá asosiashon ku empresanan estranhero.
Merka ayera a anunsiá di lo pone fin na e fleksibilisashon dekretá seis luna pasá, ku tabata outorisá e produkshon i benta di petroli i gas na Venezuela, pero ku tabatin komo kondishon ku tur kos mester ta normal ku bista riba elekshonnan presidensial di 28 di yüli, durante kua e presidente Nicolás Maduro lo buska su di tres mandato di seis aña.
“E lisensia ta bisa ku nos ta sigui avansá, nos ta kresiendo”, segun Tellechea na prensa. “Di ningun manera nan no ta afektá ekonomia, tin stabilidat máksimo i kresementu máksimo”, segun el a agregá
Departamento di Finansa norteamerikano a duna espasio pa “likidashon di transakshonnan” pendiente te 31 di mei, loke segun Tellechea ta un “proroga” pa “tur e empresanan transnashonal ku tin un invershon den Venezuela por pidi nan lisensia partikular”, manera a keda hasí pa Chevron.
“Nos reakshon ta ku nos ta disponibel, dispuesto pa sigui avansá ku tur e empresanan transnashonal ku ke bini”, segun Tellechea, ku algun minüt promé a firma un akuerdo pa e operashon konhunto ku e empresa spañó Repsol pa oumento di su produkshon di krudo i gas, destiná pa paga debe.
E lisensia “ta dunando apertura pa empresanan asiátiko, europeo, indio pa bin pidi nan lisensia i sigui traha ku Venezuela”, segun Tellechea kende ala bes ta presidente di PDVSA.
