WASHHINGTON, MERKA (AFP).- E lider republikano di Kámara di Representantenan di Merka a anunsiá di lo someté na votashon un pakete di yudansa militar ku ta inkluí US$ 61.000 mion pa Ukrania, komo tambe míles pa Israel i Taiwan.
E votashon ku lo tuma lugá djasabra, porfin lo por disidí riba e yudansa ku Kiev ta pidi ku insistensia pa por enfrentá e invashon ruso. Pero tambe e ta habri un enfrentamentu entre e presidente di Kámara, Mike Johnson, i e ala radikal di su partido, ku durante di lunanan largu a blòkia e yudansa na Ukrania i esaki bou di influensia dje kandidato presidensial Donald Trump.
Ademas di e 61.000 mion pa Ukrania, e proyektonan di lei ta asigná mas di 26.000 mion dollar pa Israel. Esei ta inkluí 9.200 mion dollar komo yudansa humanitario pa Gaza, ku ta un eksigensia dje demokratnan, i 8.000 mion pa Taiwan, ku China ta konsiderá komo parti di su teritorio i ku el a sigurá di lo rekuperá i te hasta usando forsa si ta nesesario.
“Mi ta apoyá e pakete aki firmemente pa duna Israel i Ukrania e apoyo krusial aki”, segun presidente demokrat Joe Biden, kende for di fin di aña pasá tabata ke mira ku e desishon aki ta keda aprobá.
“Una bes e pasa, lo mi manda e siguiente mensahe pa rònt mundu: nos ta apoyá nos amigunan i lo no laga ku Iran òf Rusia lo triunfá”, segun el a agregá.
Johnson tabata bou di preshon enorme di White House i gran parti di Kongreso pa permití ku e Kámara lo vota pa un pakete di yudansa pa Ukrania i Israel, despues ku esaki keda aprobá pa Senado. Pero el a pone un banda e pakete di 95.000 mion dollar i a pusha otro proposishon.
“Esaki ta un mensahe hopi importante ku nos lo manda pa rònt mundu”, segun Johnson a deklará. “Pa mi no bira den rònt, mi ta preferá manda bala pa Ukrania en bes di nos muchanan norteamerikano”.
No ta bon kla si e Samara ku e ta liderá komo tampoko e Senado, kontrolá pa demokratnan, lo duna nan oké na e proposishon.
