EL CAIRO, AP.- Un abogado egipsio a indiká djasabra ku e i otronan a presentá un kaso pa obligá Parlamento pa inisiá un debate riba e modifikashon di un klóusula konstitushonal ku ta prohibí presidente Abdel-Fattah el-Sissi pa postulá pa un terser mandato na aña 2022.
Ayman Abdel-Hakim Ramadan a bisa na The Associated Press ku un tribunal di El Cairo ta partisipá den su promé oudiensia pa e kaso riba 23 di desèmber.
El-Sissi a deskartá ku e ta buska un terser periodo, pero esaki no tabata kategóriko. El a señalá di lo buska un terser periodo, solamente si e egipsionan ta deseá esaki. Segun e Konstitushon di Egipto, un presidente por kumpli ku solamente dos periodo konsekutivo di kuater aña kada unu.
Parlamento mester vota pa enmiendanan konstitushonal, i despues e mester wòrdu ratifiká den un referèndem nashonal.
Ramadan a indiká ku el-Sissi a supervisá un kantidat “inkreibel” di logro desde 2014.
El a gana un segundo mandato di kuater aña na 2018. El a wòrdu reeligí praktikamente sin oposishon, despues ku tur e posibel kontrinkantenan serio a wòrdu enkarselá òf intimidá pa bandoná e kontienda.
