NEW YORK, AP.- Pa promé bes e ADN kombiná di tres persona ta produsí un yu, asina un grupo di sientífiko a informá. E ophetivo ta di evitá ku e yu ta heredá un ke otro malesa di su mama ku por kousa despues su morto. E nasementu di e yu hòmber a keda reportá pa e revista sientífiko Fertility & Sterility.
A anunsio ku e pènel di ekspertonan lo presentá mas detaye di e resultado den un konferensia di prensa otro luna. E revista New Scientist a bisa ku e yu a nase 5 luna pasa di mayornan hordano bou di tratamentu na México di un ekipo dirigí pa e dòkter John Zhang di e sentro di fertilidat New Hope di New York. E téknika no a keda aprobá na Merka pero dòkter Zhang a bisa na e revista ku mas importante ta ku e ta salba bida. E beibi lo a heredá e ADN ku ta kousa e síndrome di Leigh un enfermedat neorológiko ku usualmente ta kaba ku bida di e yu despues di algun aña.
E téknika ta impliká saka parti di ADN di e mama su ovulo i laga e ADN para. E ADN salú ta keda poné den ovulo di un donante, ku ta keda fertilisá. Asina e yu tin ADN di tantu su mayornan komo di e donante di ovulo.
