ALEPO, AP.- Un buelo komersial sirio a aterisá na Alepo desde Damascus djárason, reanudando buelonan interno entre e dos siudatnan di mas grandi pa promé biaha desde 2012 na Siria.
E buelo tabatin miembronan di gobièrnu i periodistanan, i tabata un mensahe simbóliko di e gobièrnu di presidente Bashar Assad, algun dia despues ku su forsanan a konsolidá kontrol den provinsia di Alepo i habri e karetera M5 ku ta konektá Alepo ku Damascus. Outoridat a habri e karetera pa promé biaha den ocho aña.
Forsanan di gobièrnu tin vários siman ta purbando di haña kontrol di zonanan rural di Alepo i parti di e provinsia Idlib na nortwèst di Siria, respaldá pa e intentonan di atakenan aéreo di Rusia. Esaki ta algun di e último zonanan bou di kontrol rebelde den e pais.
E atake a pone míles di sivil hui pa frontera ku Turkia, un di e desplasamentunan di mas grandi den ocho aña di guera. Nashon Uni a kalkulá riba 1 di desèmber ku mas di 900.000 sivil a wòrdu desplasá. Mas di mitar di e sivilnan aki ta hende muhé i mucha.
