BARCELONA, SPAÑA (AFP).- Outoridatnan spañó a interseptá un boto kargá ku mas di kuater tòn di kokaina ku a Sali for di Suramérika i a yega zùit dje islanan Canaria. E barku a keda lokalisá na 920 km zùit dje archipielago spañó situá dilanti di kosta nortwèst di Afrika. Su kuater tripulantenan, di nashonalidat spañó, rumano, marokí i moldave a keda detené.
“Despues di interseptashon i pisamentu di droga, a komprobá inmediatamente ku ta trata di 4.350 kilo di kokaina, segun polis spañó.
E operashon a start ku kolaborashon internashonal entre vários entidat, entre nan Agensia Nashonal kontra di Krímen di Reino Uni (NCA) i e agensianan antidroga di Merka (DEA), ademas di outoridatnan spañó.
Ku e informashonnan kompilá, e agentenan a kuminsá buska e barku, konsiderá “sospechoso di tráfiko di droga prosedente di Suramérika”.
Segun Polis, e operashon ta den kuadro di e lucha kontra di narkotráfiko riba e “ruta Atlántiko di kokaina”, usá pa tipo di barkunan prosedente di Suramérika i ku ta bai e kontinente europeo.
Djabièrnè siman pasá, un barku i droga a dal den un boto di Guardia Civil spañó, kousando morto di dos agente i oumentando e preokupashon pa e aktividat di narkotráfiko den e pais.
