LOS ANGELES, AP.- Akademia di televishon a vota pa kuminsá un proseso disiplinario kontra e magnate di sine Harvey Weinstein.
E akademia, ku ta otorgá premionan Emmy, a bisa ku a programá un oudiensia pa novèmber kaminda lo konsiderá akshonnan ku ta inkluí e “terminashon di su miembresia den e akademia”.
Weinstein, ku resientemente a wòrdu akusá di múltiple insidente pa abusu seksual durante vários dékada, a wòrdu retirá di The Weinstein Co., un kompania di sine i TV ku el a fundá ku su ruman hòmber Bob. Tambe el a wòrdu ekspulsá di Akademia di Arte i Siensia Sinematográfiko, Sindikato di Produktornan i Akademia Britániko di Sine i Televishon.
Awor e ta enfrentá investigashonnan kriminal den tres siudat despues ku un aktris italiano a bisa na detektivenan na Los Angeles ku e magnate di sine a viol’é den kamber di un hotèl kaminda e tabata keda na aña 2013.
Polis a konfirmá djaweps ku ta investigando e denunsia di e muhé i su abogado a bisa ku lo duna detayenan adishonal den un konferensia di prensa den sentro di Los Angeles.
E muhé no identifiká ta un aktris i modelo italiano, segun e anunsio di e konferensia di prensa di abogado David M. Ring. Ademas di papia ku detektivenan, e muhé i Ring a kombersá ku Los Angeles Times djaweps i a bisa ku Weinstein a drenta den su kamber di hotèl sin ku e tabata ke. Weinstein e ninga di bandoná e kamber i a violá e aktris.
