MOGADISCIO, SOMALIA, AP.- Míles di somalí a kongregá djabièrnè pa hasi orashon na e sitio di e atake terorista mas mortal den e pais, miéntras ku e kantidat di morto a oumentá na 358 i desena di persona ta sigui pèrdí.
E ministerio di Informashon di Somalia, Abdirahman Osman, a anunsiá djabièrnè ku 56 persona ainda ta pèrdí despues di e atake ku bòm den un kaya di Mogadiscio. 228 persona a resultá heridá i 122 a wòrdu trasladá via aéreo pa haña atenshon médiko na Turkia, Sudan i Kenia.
“E doló aki lo dura algun aña”, asina un sheik ku a enkabesá orashonnan a bisa, miéntras filanan largu di personanan tabata para dilanti edifisionan daña i edifisionan ku a basha abou.
Ehérsito merikano a bisa ku a reanudá su kampaña kontra un grupo ekstremista islámiko Al Shabab, kual a tuma responsabilidat pa e atentado aki, mediando un atake ku un drone.
E atake a tuma lugá 56 kilometer na sùitwèst di e kapital. Ainda outoridat ta evaluando e resultadonan.
Al Shabab tabata responsabel pa e atake na Mogadiscio. Outoridatnan somalí a bisa ku e atake aki tabata dirigí kontra e aeropuerto internashonal. Vários pais tin embahada akinan.
Merka a oumentá su involukramentu den e nashon desde ku presidente Donald Trump a aprobá ekspanshon di operashonnan den e pais kontra e grupo e aña aki. Washington a lansa sigur 19 atake ku drone na Somalia desde yanüari, segun e Organisashon The Bureau òf Investigative Journalism.
E siman aki, un bosero di Pentágono a bisa ku Merka tin 400 sòldat na Somalia.
