BEIRUT, AP.- Bombardeonan intenso di forsa sirio kontra suburbionan di e kapital, kontrolá pa rebeldenan, a kousa por lo ménos 130 morto den dos dia. Esaki ta un di e episodionan mas sangriento den último tres aña di guera, segun indikashon di gruponan aktivista i paramédiko djamars.
E rebeldenan a venga tirando proyektil kontra Damasco, matando por lo ménos ocho persona i sembrando pániko den e pueblo.
E violensia a surgi miéntras milisianan ofisialista a kuminsá drenta Afrin, un teritorio kurdo na nort di e pais. E atake a kastigá e zona, obligando periodistanan pa hui.
E suburbionan ataká, den un zona yamá Ghouta Oriental, tabata opheto di bombardeo desde vários siman kaminda sentenar di persona a muri òf resultá heridá. E aktivistanan di oposishon a bisa ku forsanan di gobièrnu a trese refuerso, loke ta duna indikashon ku un ofensivo ta inminente.
Videonan publiká desde suburbionan oriental a mustra paramédikonan sakando heridonan entre e ruinanan, miéntras ku otronan tabata koba entre e restunan den skuridat buskando sobrebibientenan.
Den e bombardeonan di djaluna, avionnan di guera, helikòpter i misil a wòrdu usá. Esaki a pasa serka di kaminda e gobièrnu di presidente Bashar Assad tin su asiento.
