BERLIN, ALEMANIA, AFP.- Alemania ta bai reservá uso di e vakuna di AstraZeneca pa esnan riba 60 aña despues di vários kaso di trombose, segun indikashon di e ministerionan di salú regional i federal djamars.
Sin embargo, esnan riba 60 aña ku ta deseá di haña e vakuna por risibí esaki pero solamente despues di “pidi un dòkter pa inyektá e vakuna i un análisis personal di e riesgonan”, asina e ministernan di 16 region aleman i e minister federal a bisa den un komunikado na final di e reunion.
Esnan bou di 60 aña ku ya a haña e promé dósis di e vakuna por disidí si nan ta vakuná ku e di dos dósis òf si nan ta warda riba rekomendashon di e komishon di vakunashon (STIKO) tokante e asuntu.
E kansier aleman Angela Merkel a bisa ku ekspertonan a detektá kasonan serio i inusual di trombose entre personanan ku a vakuná ku AstraZeneca. “Ta resultadonan ku nos no por ignorá”, asina el afirmá.
E minister di salú Jens Spahn a bisa ku Alemania lo kumpli ku su ophetivo di ofresé e posibilidat pa vakuná tur adulto pa fin di zomer “si tur kompania kumpli ku e entreganan anunsiá”.
