NEW YORK, MERKA.- Un wes federal di New York a kondená na bida largu di prisòn Juan Antonio Tony Hernandez pa trafiká 185 tòn di droga pa Merka segun fiskalnan, ku kolaborashon di su ruman, presidente di Honduras kende a anunsiá un apelashon di e sentensia.
Despues di e huisio di dos siman ku a tuma lugá na New York na òktober 2019 e eks diputado Tony Hernandez di 42 aña a keda hañá kulpabel di kuater kargo ku el a keda akusá di dje inkluyendo tráfikashon di kokaina pa Merka, testimonio falsu i poseshon di arma di kandela.
Durante un lektura di sentensia, e wes Kevin Castel a bisa ku e sanshon di bida largu pa Hernandez kende a keda detené na un airopuerto di Miami na novèmber 2018, ta bon meresí.
E fiskalnan di distrito sur di New York a sigurá den nan proseso ku e presidente di Honduras Juan Orlando Hernandez tabata un sosio klase di su ruman Tony Hernandez, ounke e no a keda kulpá.
E fiskalnan a eksigí bida largu, enfatisando ku Hernandez no a mustra niun duele miéntras ku defensa a pidi e pena mínimo obligatorio di 40 aña i a anunsiá alabes un apelashon.
