HONOLULU, AP.- Un alerta elektróniko falsu, ku a atvertí riba un misil balístiko dirigí pa Hawaii, a krea pániko entre e residentenan di e teritorio djasabra. Vários persona a bandoná nan outonan riba un karetera i tabata preparando pa hui di nan kasnan, te ora funshonarionan informá ku tabatin un eror.
Loke a pasa eksaktamente no ta kla. Presidente di Kámara di Representante di Hawaii, Scott Saiki, a bisa ku un persona a primi e boton robes, miéntras Kas Blanku a indiká ku e episodio tabata un “ehersisio estatal”.
Sinembargo, pa kasi 40 minüt, ta parse manera ta mundu tabata kabando na Hawaii, un isla ya nèrvioso pa e menasa di dos misil nuklear di Norkorea.
E alerta, ku a wòrdu mandá pa selularnan algu despues di 8:10’or di mainta.
E gobernador di Hawaii, David Ige, a ofresé su diskulpa pa e “doló i konfushon” kousá pa e alerta falsu.
Den un konferensia di prensa djasabra, Ige a primintí di revisá e sistema di prueba pa asina garantisá ku e eror no ta wòrdu ripití atrobe.
Riba un di e kareteranan prinsipal na nort di Honolulu, e shofùrnan a bandoná nan vehíkulonan i a kore rumbo pa un tùnel serka, segun indikashon di e korant Honolulu Star-Advertiser.
E Agensia di Maneho di Emergensia na Hawaii a tweet ku no tabatin ningun menasa 10 minüt despues di e promé alerta, pero esnan ku no tabata forma parti di Twitter no por a mira e publikashon aki. Un alerta koregí ku a informá riba e “alerta falsu” no a yega na telefòn di usuarionan te ku 38 minüt despues.
