ALGIERS, ALGERIA, AFP.- Presidente di Algeria Abdelmadjid Tebboune a duna klemensia na mas di 1000 persona detené, inkluyendo 70 detenido relashoná ku e protestanan di Hirak den e pais.
Tebboune a firma “un dekreto presidensial ku a duna klemensia na 1.076 detenido”. E motibu pa esaki koinsidí ku e luna sagrado musulman di Ramadan, segun indikashon di presidensia di e pais.
E 70 detenidonan vinkulá ku Hirak a wòrdu liberá e siman aki.
E protestanan na fabor di demokrasia di Hirak dos biaha pa siman a sakudí e nashon na nort di Afrika desde komienso di 2019, kual a obligá renunsia di Abdelaziz Bouteflika algun luna despues.
E presidente a duna klemensia na e aktivista di derechi humano Zaki Hannache, detené den febrüari pa defendé aktonan terorista i publikashon di notisia falsu.
E grupo aktivista CNLD a bisa ku tin alrededor di 300 persona detené na Algeria relashoná ku Hirak, periodismo òf aktivismo.
