ALGIERS, ALGERIA, AFP.- Presidente di Algeria, Abdelmadjid Tebboune a duna òrdu djadumingu pa para eksportashon di gas pa Spaña via liñanan di oleodukto ku ta krusa Maroko, pa motibu di tenshonnan ku Rabat.
Algeria, e kapital di eksportashon di gas di mas grandi di Afrika a usa e oleodukto di Gaz-Maghreb-Europe (GME) desde 1996 pa entregá miónes di meter kúbiko pa aña na Spaña i Portugal.
Pero e kontrakt di GME lo a kaduká djadumingu, dos luna despues ku Algiers a kibra tur relashon diplomátiko ku Rabat pa motibu di “aktonan hostil”, akusashonnan ku Maroko ta ninga.
Tebboune a “duna òrdu pa para tur laso komersial entre Sonatrach i Ofisina Nashonal d Koriente i Awa di Maroko (ONEE) i pa no renobá e kontrakt”, segun un komunikado di presidensia.
E medida lo no tin un impakto signifikativo, segun indikashon di ONEE den un komunikado djadumingu anochi.
Tebboune a tuma e desishon despues di konsultá ku e promé minister i ministernan di energia i eksterior “relashoná ku e komportashon hostil” di Maroko, segun e komunikado.
Funshonarionan argelino i spañó a bisa djárason ku Algiers lo entregá su gas na Spaña eksklusivamente atraves di un gasodukto supmarino pa evitá Maroko.