BOGOTA, COLOMBIA, AFP.- E alkaldesa di Bogotá, Claudia Lopez, a pidi pordon pa violensia di parti agentenan polisial den e pais. Esaki a sosodé durante un seremonia kaminda tabatin famia di vários manifestante ku a resultá heridá òf morto durante e protesta di e último sinku dianan na Colombia.
Mas o ménos 150 persona a haña invitashon pa presensia e evento kual no tabata públiko, pa evitá aglomerashon di hende.
E mandatario a pidi pordon pa kada un di e víktimanan ku a muri. Mayoria tabata hóbennan ku polis a tira mata. E manifestashonnan a kuminsá djárason pa rechasá asesinato di Javier Ordoñez, un ingeniero di 43 aña ku a wòrdu kastigá pa dos polis. Diestres persona a muri den e manifestashonnan último. Ademas, 178 sivil a resultá heridá di kual 75 tabatin herida di bala, segun e alkaldesa. Outoridat a reportá ku 194 agente a keda heridá, mayoria pa herida di bala.
