NASHON UNI, AP.- Jair Bolsonaro a sostené djamars ku e kuestionamentunan ambiental di Brasil, partikularmente relashoná ku Amazonia, ta konstituí un interferensia inaseptabel den asuntunan interno di su pais pero “disfrasá komo un bon intenshon”.
Bolsonaro a pone énfasis riba e echo ku “kualkier inisiativa di sosten na preservashon di e selva mester wòrdu tratá respetando soberania di Brasil”.
E mandatario a redusí e presupuesto destiná na preservashon di medio ambiente, kual ta kontra di esfuersonan pa kontené e kandela enorme ku a destruyendo un ekstenshon enorme den e selva amazóniko, e selva tropikal mas grandi na mundu i vital pa ekilibrio di e planeta su klima.
Bolsonaro a afirmá ku su gobièrnu ta “komprometé ku preservashon di medio ambiente i ku desaroyo sustentabel” i a indiká ku e kandelanan aki a wòrdu provoká pa faktornan manera klima seku, bientu i delinkuentenan. “Ta importante pa nos menshoná ku e poblashon indígena i di e zona amazóniko ta usa e kandela komo parti di su kultura i pa sobreviví”, asina el a indiká.
Su afirmashonnan a wòrdu kritiká pa Amazon Watch. E direktor di e programa, Christian Porier a bisa ku e diskurso di Bolsonaro ta “indignante, anti demokrátiko, rasista i violento”.
