FAIRFAX, MERKA, AFP.- E aktor merikano Amber Heard a disidí pa apelá e veredikto di e hurado di un kaso multimionario di difamashon ku el a pèrdè kontra su èks kasa, e aktor di “Pirates òf the Caribbean” Johnny Depp.
Abogadonan di Heard, ku tin 36 aña i kende a protagonisá den e pelíkula di superhéroe “Aquaman” a apelá dilanti di Korte di Apelashon di estado do Virginia.
“Nos ta kere ku e tribunal a kometé erornan ku a impedí un veredikto hustu i konforme e Promé Enmienda”, segun un komunikado di un bosero di Heard, refiriendo na e enmienda konstitushonal ku ta protehá libertat di ekspreshon.
Den yüni, un hurado di Virginia a deklará na fabor di Depp, ku un indemisashon di 10 mion dòler na daño i perhuisio, determinando ku un kolumna publiká pa Heard den The Washington Pòst na 2018 tabata difamatorio kontra e aktor.
Heard, kende tambe a demandá Depp, a haña 2 mion dòler den e huisio, kual a wòrdu sigui bibu pa míles di merikano i vários pais rònt mundu.
E hurado a yega na e veredikto despues di un proseso intenso di seis siman.
