BEIRUT, AP.- Amnistia Internashonal a pidi e koalishon liderá pa Merka den e kombate kontra Estado Islámiko pa investigá e atakenan aéreo ku a mata sivilnan den e kampaña di 2017 pa liberá e siudat sirio Raqqa.
Luna pasá e grupo di e koalishon a rekonosé di a mata 78 sivil mas di loke a wòrdu registrá originalmente durante e atake na Raqqa na aña 2017. E grupo defensor di derecho humano a bisa ku esaki “tabata apénas e komienso”.
E rekonosimentu di e koalishon mester habri kaminda pa un investigashon pa determiná dikon tabatin sivilnan morto i ken tabata esnan responsabel. Den su komunikado, Amnistia Internashonal a agregá ku e sivilnan di e siudat meresé hustisia i kompensashon.
El a sostené ku sentenar di sivil a muri den e kampaña na Raqqa i ku e koalishon ta minimalisando e sifra di e víktimanan.
E asesor di AI, Donatella Rovera a bisa ku e koalishon mester emití “informashon sustansial i verifikabel” riba e forma kon a skohe e blankonan na Raqqa i kon a realisá e atakenan.
“Kon e koalishon por evitá e mortonan di e sivilnan den futuro sin rekonosé e erornan kometé na Raqqa”.
