WASHINGTON, AP.- Analistanan merikano a bisa djaluna ku a lokalisá mas di mitar di e 20 sitionan sekreto di fabrikashon di misil na Norkorea. Esaki ta resaltá e difikultat ku e gobièrnu merikano ta enfrentá pa garantisá ku e norkoreanonan ta kumpli ku e akuerdo pa pone fin na su programanan nuklear.
Ounke e sitionan no ta plataforma di lansamentu, e outornan di e informe di Sentro di Estudio Stratégiko i Internashonal a bisa ku esakinan ta sekreto, kual ta revelá magnitut di e programa di misil norkoreano.
E outornan ta bisa ku e instalashon por wòrdu usá pa tur klase di misil. Ademas, nan mester wòrdu deklará pa Norkorea i mester wòrdu inspekshoná bou di un akuerdo konfiabel i verifikabel.
Vários eksperto den asuntunan norkoreano ku no a partisipá den e elaborashon di e informe a bisa ku e deskubrimentunan no ta sorprendente, debí na e aktividatnan di Pyonyang den pasando. Nan a deskartá ku Kim no a komprometé pa para e fabrikashon di e armanan nuklear òf misil den su negosiashonnan ku Trump òf ku sekretario di Estado, Mike Pompeo.
