BEIJING, AP.- Den un siudat usualmente afektá pa nivel haltu di kontaminashon, un artista ulandes a bin ku un idea di un solushon poko eksentriko; un struktura di metal di 7 meter haltu ku ta tuma e aire polushoná.
E “smog free tower” ta un obra di e artista Daan Roosegaarde i ta keda ekshibí for di ayera den Distrito 798, e bisindario selebre di e artista di Beijing.
Ku 45 metal ku ta meskos ku yalusí ku ta keda habrí el a konstruí e toren ku ta kontené un mashin purifikadó di aire ku ta permití un purifikashon konstante.
“E no ta kousa zonido”, asina Roosegaarde a bisa pará banda di e toren. “E ta bunita, zonido di aire limpi ku ta suplando afó”. Tin poko rekurso mas apresiá na Beijing ku aire limpi, partikularmente den wenter ora e kontaminashon ta oumentá pues e fábrika nan di koriente ku ta traha a base di karbon ta funshoná na nan kapasidat máksimo. E nivelnan di e polvo i e aire di Beijing ta entre esnan pió na mundu. Segun outoridatnan, e kontaminashon a generá nivelnan eksepshonalmente haltu di kanser di pulmon. I den dianan partikularmente grave, skolnan ta prohibí muchanan sali den kurá i personanan ta kana riba kaya ku nan boka i nanishi tapá.
Roosegaarde kende su proyektonan ta trata di vinkulá e hende ku naturalesa i fuentenan di energia, a haña e idea di e toren ora el a bishitá Beijing tres aña pasá.
