CIUDAD DE PANAMA (AFP).- E salsero panameño Ruben Blades ta di opinion ku e viktoria di José Raúl Mulino den elekshon presidensial na e pais, ta un triunfo di “korupshon”.
“Mi ta skibi esaki ku hopi lamento. M’a faya kompleto ora m’a kere ku J.R. Mulino lo no keda eligí komo presidente di Panamá, pero lo kontrario. A mustra un demostrashon di apoyo na korupshon i el a bira e mandatario nobo di Panamá”, segun e kantante.
Blades a lamentá e resultado di elekshon bisando “Korupshon a gana, pero demokrátikamente”.
Mulino a logra 34% di votonan pa gana e elekshon presidensial djadumingu último i e ta sustituí Martinelli, kende a keda bahá despues ku a konfirmá un kondena di kasi diesun aña di prizòn den su kontra pa robo di miónes dollar.
Pa evitá di bai prizòn, Martinelli a buska asilo den embahada di Nicaragua, for di unda na vários okashon el a apoyá su kolega di partido atrabes di retnan sosial p’awor mira ku esaki a gana elekshon.
“Por bisa ku un konvikto, un korupto i un hòmber ku ta hui di hustisia a gana e presidensia di nos repúblika via di un individuo ku a aseptá pa represent’é. El a hasi esei ku voto direkto di un pueblo ku ta kondená su mes pa su iresponsabilidat”, Blades a skirbi.
Ku e triunfo aki, Panamá ta manda un “mensahe hororoso” na mundu, apesar ku e viktoria ta legal, segun e kantante di “Pedro Navaja”, “Decisiones” i “Buscando Guayaba” i ganadó di hopi premio Grammy.
Blades, minister di turismo durante gobièrnu dje sosial demokrat Martin Torrijos (2004-2009), tabata kandidato presidensial den 1994, finalisando elekshon na di tres puesto.
“Pakiko nos mester tin polis” pa persiguí delito, si nos a kaba di premia esaki entregando e poder ehekutivo na Ricardo Martinelli”, segun Blades a lamentá.
