COLOMBO, SRI LANKA, AP.- Un funshonario di Sri Lanka a bisa djamars ku e atentadonan riba Pasku di Resurekshon, kual a laga 321 morto, a wòrdu ehekutá pa fundamentalistanan islámiko den represaya pa e masakrenan kontra dos moské luna pasá na New Zealand. E atake a wòrdu kometé pa un ‘supremasista’ koló kla.
E grupo Estado Islámiko a informá di ta responsabel pa e atakenan suisidio kontra iglesia, hotèl i otro sitionan. E grupo no a duna evidensia pa sostené su deklarashon.
Anteriormente, outoridat di Sri Lanka a indiká ku Towheed Jamaar Nashonal ta responsabel pa e atake. Esaki ta un grupo ekstremista islámiko konosí riba e isla.
E minister di Defensa di e nashon, Ruwan Wijewardene a indiká ku e nuebe atakenan por a tuma lugá dor di e “debilidat” di e aparato di seguridat di Sri Lanka i su inkapasidat pa prevení esakinan.
E grupo Ekstremista a publiká su deklarashon atraves di su agensia di notisia Aaamaq, pero no a mustra potrèt ni video di e atakantenan hurando lealtat na e grupo. Esaki ta pruebanan ku e grupo a duna anteriormente.
E seis atakenan tabata un di e atakenan mas mortal den mas di un dékada den e pais. E sifra ofisial di morto a oumentá na 321 persona, ku 500 herido.