NASHON UNI, AP.- E sekretario general di Nashon Uní, Antonio Guterres, a skohe e eks presidente chileno Michelle Bachelet, komo hefe di Derechi Humano di e organisashon. Asina fuentenan diplomátiko a bisa djárason. Ta trata di un puesto ku gran reperkushon i ku normalmente ta provoká kontroversia.
Segun e diplomátikonan, kende a papia ku kondishon pa keda anónimo, e supsekretario general Amina Mohammed a revelá e desishon di Guterres na un grupo di embahador djamars.
E posibel komishonado di Nashon Uní pa Derechi Humano mester wòrdu konfirmá pa Asamblea General, di 193 miembro.
E bosero di Nashon Uní, Farhan Haq a bisa ku e no por a konfirmá e informe, pero ku “e proseso ta yegando su final”.
Bachelet tabata un aktivista destaká pa derechi di hende muhé.
E tabata e promé presidente na Chile, den periodo 2006-2010. Despues di esaki, e sekretario general Ban Ki-moon a designá pa presidí Nashon Uní pa Hende Muhé, un agensia krea pa Asamblea General na aña 2010 pa asina kombiná kuater organismo di Nashon Uni ku ta promové igualdat di género i empoderamentu di muhénan.
