WASHINGTON, MERKA, AFP.- E presidente di Banko Mundial David Malpass a pidi “un plan integral” pa yuda paisnan pober ku ta saliendo for di e pandemia.
Vários gobièrnu a logra inyektá plaka den nan propio paisnan, miéntras Banko Mundial i Fondo Monetario Internashonal a duna fiansa di emergensia na paisnan gravemente afektá pa e krísis. I ounke e meta tabata pa yuda sektornan vulnerabel i mantené nan ekonomia, e debe di paisnan ku entrada abou a subi ku 12% aña pasa, segun un informe di Banko Mundial.
Ta urgente pa atendé ku e problema aki, mirando ku fin di aña e Inisiativa di Suspenshon di Servisio di Debe (DSSI), lansa pa e Grupo di 20 nashonnan industrialisá i emergente (G20), ta kaduká. E inisiativa ta duna gobièrnunan e oportunidat pa aplasá nan debenan dor di e pandemia di COVID.
“E riesgo ta ku e paisnan lo Sali for di e krísis di COVID-19 ku un debe enorme ku lo dura añanan pa paga bek”, asina Malpass a bisa. El a agregá ku “nos mester di un enfoke integral pa e problema di debe, kaminda ta konsiderá un redukshon di e debenan, un restrukturashon mas rápido i mas transparensia”.
