SANTIAGO, CHILE, AFP.- Un persona a muri, por lo ménos 10 ta detené i 17 a keda heridá despues di un konfrontashon entre polisnan i manifestantenan durante un marcha na Santiago na fabor di e pueblo Mapuche, e tribu di mas grandi di Chile, segun informashon di outoridat.
E víktima tabata un dama abogado di gobièrnu di 43 aña ku a partisipá den e manifestashonnan ku e mapuchenan. Promé ku e konfrontashon, el a aserka e polisnan pa papia.
“Pero un grupo ku kapushon a tira vürwèrk riba e multitut i impaktá e víktima”, segun indikashon di e hefe di polis, Enrique Moras.
E muhé a keda transportá pa Hospital di Urgensia di Santiago kaminda el a wòrdu operá. “Pero lamentablemente e pashènt a muri durante operashon”, segun un komunikado di e hospital.
Fiskal a kuminsá investigá e kaso “pa aklará kiko a sosodé den e insidente aki”, segun indikashon di e minister di Interior, Rodrigo Delgado.
Polis a agregá ku e protesta a laga 17 agente herida, i 9 persona detené pa desòrdu i 1 pa karga arma.
