SANTIAGO, CHILE (AFP).- Marina chileno den 2023 a detektá un fayo na un dje aparatonan ku tin di aber ku kombustibel dje barku di kònteiner ku a dal kontra di un brùg na Baltimore, den ost di Merka, segun a keda konfirmá ayera. Tabata un problema tékniko ku a keda solushoná na e okashon ei.
“E barku a keda inspekshoná pa un inspektor di Estado Rector del Pueblo (ERP) di Chile na e haf di San Antonio dia 27 di yüni di 2023, detektando ku no tabata por a lesa e indikadó analógiko dje kalentamentu di kombustibel”, segun Armada chileno ta bisa den un komunikado.
E defisiensia a keda solushoná dia 27 di yüni, loke a pèrmit pa e barku por a subi laman bèk for di e haf di San Antonio, kaminda ta mobilisá mayor kantidat di karga dje pais.
Imágennan kaptá pa kámaranan di vigilansia ta mustra kon e barku di kònteiner a dal kontra un pilá di Francis Scott Key Bridge, poniendo ku gran parti dje struktura a kai den e riu Patapsco.
Den kareda di 01:30 or di mardugá a mira lusnan, aparentemente di outonan, riba e brùg promé ku esaki a deformá i kai sekshon pa sekshon. Tambe a tuma nota di vários eksploshon chikí.
Servisionan di emergensia tabata buska por lo ménos seis persona ku a disparsé despues dje choke.
Presidente Joe Biden a kalifiká e suseso komo “un aksidente teribel” i a primintí ku lo rekonstruí e brùg mas lihé posibel.
E barku di kònteiner tabata nabegá bou bandera di Singapur, ku e nòmber “Deli” i a sali for di Baltimore pa bai Colombo, Sri Lanka.
