LA PLATA, ARGENTINA (AFP).- Hustisia argentino a kondená 10 persona na kastigu di bida largu pa krímennan kometé durante di diktadura (1976-1983) den tres sentro klandestino di Buenos Aires.
Durante e kaso ku a start den 2020, den kua tantu testigu komo sobrebibientenan a deklará, a konsiderá ku a proba kasonan di sekuestro, tambe di desaparishon fòrsá di hendenan persiguí pa polítikonan, homisidio, violashon, hòrtamentu di mucha, aborto fòrsá i otro krímennan.
E tribunal a ordená investigashonnan médiko urgente pa por tuma desishon si ta revoká sentensia anterior di prizòn domisilio ku kua mayoria di esnan kondená ta gosa.
E kondenanan a bira konosí dos dia despues di un aniversario nobo dje gòlpi di estado di 24 di mart di 1976, rekordando ku marchanan rònt e pais i un konsentrashon enorme riba Plaza de Mayo bou dje lema “memoria, bèrdat i hustisia”.
E kaso “los pozos” a eksponé e loke a tuma lugá den sentronan klandestino di detenshon konosí komo Pozo de Banfield, Pozo de Quiles i Brigada de Lan, e último aki yama “el infierno” pa e atrosidatnan ku einan tabata kometé kontra di esnan persiguí pa polítikonan.
E tres sitionan a keda usá bou supervishon dje temibel eks-direktor di polis dje provinsia di Buenos Aires Miguel Etchecolatz, kende tambe a keda akusá pero a muri den prizòn na edat di 93 aña den yüli di 2022 na momento ku e tabata kumpli ku nuebe kondena di bida largu. Ademas di Etchecolatz, sinku otro akusado a muri durante dje proseso i 12 a risibí veredikto. Di e grupo ei, dies a keda kondená na bida largu di prizòn, un na 25 aña i unu a keda apsolvé.
