BEIJING, CHINA, AFP.- China a kritiká e imposishon di tèstnan di covid di parti di vários pais pa biaheronan di China, enfrentando un ola di kasonan sin presedente.
“Algun pais a establesé restrikshonnan di entradanan dirigí eksklusivamente pa biaheronan chines. Esaki no tin niun base sientífiko i algun práktika ta inaseptabel”, asina Mao Ning, un bosero di Eksterior a bisa.
Un komité di eksperto di salubridat di Union Europeo ta na fabor di realisá pruebanan di covid pa biaheronan di China, promé ku nan sali pa Europa, segun un bosero di Komishon Europeo.
E ekspertonan a eksaminá otro proposishonnan di e Komishon, manera uso obligatorio di tapaboka den buelonan di China, kontròl di awa den avionnan i un refuerso di tèstnan, pa identifiká posibel variantenan nobo.
Un bosero a bisa ku “e medidanan lo wòrdu apliká di forma koordiná pa garantisá su efikasia”.
China a anulá su restrikshonnan di salubridat, un desishon ku a provoká un avalancha di pashèntnan den hospitalnan i di víktimanan mortal.
Desénas di paisnan, manera Spaña, Fransia i Merka a imponé un tèst di covid pa biaheronan di China den e último dianan, preokupá pa e falta di transparensia riba sifranan di infekshon i teniendo aparishon di variantenan nobo na kuenta.
