WASHINGTON, MERKA, AFP.- Ainda Merka no ta konsiderá Nicolás Maduro komo e presidente legítimo di Venezuela, segun e departamento di Estado, ku ainda ta rekonosiendo e opositor Juan Guaidó di Asamblea Nashonal di 2015.
“Nos enfoke relashoná ku Nicolás Maduro no a kambia. E no ta lider legítimo di Venezuela”, segun indikashon di e bosero di Departamento di Estado, Ned Price.
Ainda Merka ta rekonosiendo Asamblea Nashonal “skohé demokrátikamente” na aña 2015 komo e último institushon demokrátiko ku a keda den Venezuela.
Merka no ta rekonosé Maduro komo presidente pa konsiderá su reelekshon na 2018 komo froudulento i desde e tempu ei a sostené e lider opositor Juan Guaidó, kende a deklará su mes komo “presidente interino” riba 5 di yanüari 2019.
Desde e fecha aki Guaidó a haña kontròl di aktivonan venezolano blòkiá den eksterior pero nunka e no a haña poder komo presidente apesar di un sosten internashonal amplio ku a baha segun tempu a pasa.
Siman pasá su propio oposishon a disidí pa pone fin na e gobièrnu interino desde 5 di yanüari.
