WASHINGTON, AFP. Presidente merikano Joe Biden a biaha ayera pa Kentucky, hibando kuné un mensahe di union i di mobilisashon na fabor di e estado aki ku a keda asotá pa un seri di warwarú.
E mandatario lo bula pasa riba e zona destruí i e lo bishitá dos di e lokalidatnan mas afektá, Mayfield i Dawson Springs, e último ei ku daño di 75%.
Den sentro di Mayfield, promé ku yegada di e komitiva di presidente, Bryan Wilson ta kalkulá e pèrdidanan miéntras ta buskando forma di skapa dokumentonan, archivonan, entre otro kos.
“Ta masha importante pa e presidente bin. Esei ta mustra ku na Washington ainda tin hende ku ta interesá den e parti rural di Merka”, asina Wilson a bisa na AFP.
Tambe el a menshoná e muestranan di solidaridat inkreibel ku damnifikadonan miéntras ku rondó di nan personanan, obreronan i boluntarionan ta hasiendo trabou di limpiesa, mei mei di mashinnan pisá di konstrukshon ku ta hasiendo hopi bochincha.
“No ta un asuntu republikanonan, demókratanan òf independientenan”, asina el a komentá, mustrando riba un argumento ku Biden gusta usa, ya ku esaki ta bai muchu mas leu ku e divishonnan partidario.
