WASHINGTON, USA (AFP).- Dilanti di lidernan di 11 pais, presidente Joe Biden a komprometé su mes na fasilitá e invershon di míles di miónes di dòler den Amérika Latina pa por “eligí” entre Merka i “e trampa di debe” chines.
E presidente norteamerikano a risibí na White House e mandatarionan di Chile, Colombia, Costa Rica, Ecuador, Perú, República Dominicana, Uruguay, Canadá i Barbados, i e ministernan di Relashonnan Eksterior di Mexico i Panamá pa e promé kumbre di Aliansa pa Prosperidat Ekonómiko na Amérika.
“Merka ya kaba ta e mayor fuente di invershon na Amérika Latina i Karibe, i nos ta bai sigurá pa nos bisiñanan mas yegá sa ku nan por skohe entre diplomasia di trampa di debe i enfokenan transparente di kalidat haltu pa infrastruktura i desaroyo”, segun Biden a bisa.
Merka ta akusá China di ta usa e debe pa logra ophetivonan stratégiko.
Pa kontra arestá e kresiente influensia di Beijing, Biden a anunsiá ku “Koperashon Internashonal Finansiero i Desaroyo di Merka i Banko Interamerikano di Desaroyo ta lansa un plataforma nobo di invershon pa destiná míles di miónes di dòler pa konstrukshon di infrastruktura sostenibel den Amérika”.
E no a menshoná sifra, pero e plaka lo keda destiná mas ku tur kos pa “fortalesé energia limpi, infrastruktura digital, hafnan moderno” pasobra esaki ta e komponentenan básiko di un ekonomia kompetitivo i resistente”, segun el a bisa.
Durante dje kumbre, ku ta tuma lugá kada dos aña, Amérika “por bira e region ekonómikamente mas kompetitivo di mundu”, Biden a bisa.
Pero pa esei mester superá desafionan di kambio di klima, e desigualdatnan di entrada i mas ku tur kos e migrashon ilegal, ku ta un doló di kabes pa e dirigente demokrat, kende republikanonan ta akusá di no ta hasi sufisiente pa frena esaki na e frontera ku Mexico.
Merka a realisá mas di dos mion di interseptashon di migrantenan ku a krusa e frontera ku Mexico sin visa for di yanüari, un sifra ku ta hunga kontra di Biden pa su reelekshon presidensial di 2024.
