MADRID, SPAÑA (AFP).- Si Pedro Sanchez lo bolbe bira presidente di gobièrnu spañó esei ta dependé eksklusivamente di Carlos Puigdemont, pero e independista catalán a disidí ku e ta laga e sosialista warda un ratu pa demostrá ku no ta fásil pa konvensé su persona.
Djaweps último a parse ku tur kos ta kla. Kedando serka di Brussel pa evitá ku hustisia spañó ta pone man riba dje, e lider di Cataluña di 2017 a konvoká un reunion di su partido Juntos por Cataluña (Junts per Catalunya, JxCat) den un hotèl na e kapital belga.
Inkluso el a sòru pa mikrofon pa un enkuentro ku prensa, pero na final el a bai sin hasi uso di esei. En bes di esei, el a laga un mensahe riba X (ántes Twitter) pidiendo “pasenshi” i esei “pa mas purá ku algun hende tin”. Ku esei el a referí di forma dirèkt na e sosialista Pedro Sanchez.
A kambio dje apoyo di e shete diputadonan di su partido, Puidgemont ta eksigí amnistia pa e independistanan prosesá pa hustisia spañó.
Ku e medida aki, algu kontroversial i aseptá pa sosialistanan, lo mester pèrmiti’é regresá Spaña, seis aña despues di su huida pa Bèlgika den e dianan despues ku el a faya pa logra e separashon di Cataluña.
E proposishon di lei di amnistia dje sosialistanan ya a risibí aprobashon dje otro partido independista, Esquerra Republicana de Catalunya (ERC), ku ta goberná den e region, i ku lo vota na fabor pa Sanchez pa sigui na poder.
Pa sigurá e akuerdo, e presidente di e gobièrnu aktual djaweps último a manda su man drechi, e minister Felix Bolaños, Barcelona. Segun prensa, esei ku e speransa ku Bolaños lo yega na un akuerdo ku e partido di Puigdemont.
Pero ku e sitashon aktual, Bolaños mester a limitá su mes na bisa di ta spera ku e akuerdo ku Junts lo keda firmá “pronto”.
