WASHINGTON, MERKA, AFP.- E bionario Mike Bloomberg lo invertí por lo ménos 100 mion dòler na Florida pa ‘boost’ e kampaña demokrátiko di Joe Biden na Florida, segun indikashon di medionan djadumingu.
E eks alkalde di New York a tuma e desishon despues ku Presidente Donald Trump a anunsiá ku e ta dispuesto na invertí su propio fortuna den su kampaña di reelekshon, segun indikashon di The Washington Post. Trump a gana na Florida na aña 2016.
“Votamentu lo kuminsá riba 24 di sèptèmber na Florida pues e nesesidat pa invertí plaka den estado ta urgente”, segun e bosero di Bloomberg, Kevin Sheekey.
Segun enkuestanan, Biden tin sosten di 48,2% kompará ku Trump ku 47% den e estado.
Trump a gana den tur ‘swing states’ di e aña aki na 2016. E estadonan ta inkluí Florida, Pennsylvania, Michigan, North Carolina, Wisconsin i Arizona, i tambe kuater estado ku a vota pa e demókrata Barack Obama na aña 2012.
Trump su kampaña a gasta 800 mion dòler for di komienso di 2019. E suma aki ta dos biaha mas tantu kompará ku loke Biden e invertí.