GAZA, TERITORIO PALESTINO, AFP.- Israel a stòp di tira bòm i Gaza Strip ta den silensio, pero e 11 dianan di konflikto a laga muchanan den e region troumatisá, eksponé na destrukshon i miedu di muri.
Periodistanan di AFP a entrevistá un mucha muhé ku a duna testimonio di su eksperensia horibel durante e konfrontashonnan. E insidentenan aki ku a kuminsá 10 di mei a laga 248 morto na Gaza, inkluyendo 66 mucha, segun outoridat palestino. Diesdos persona a muri na Israel, inkluyendo un mucha i un adolesente, despues ku militantenan di Gaza Strip a tira rakèt riba e pais, segun indikashon di un polis di Israel.
Segun e Organisashon No Gubernamental Save The Children, e eksposishon kontinuo di violensia ai ta afektá e salú mental di muchanan chikitu gravemente. Ningun estudio a logra kuantifiká alkanse di e trouma i trastorno di strès postroumátiko ku muchanan a sufri na Gaza den e último añanan ku a pasa.
