UMAN, UKRANIA, AFP.- Un ola di atake ruso ku misilnan i drone a provoká por lo ménos 26 morto na Ukrania djabièrnè. Outoridatnan a anunsiá ku e preparashonnan pa nan kontra atake ta yegando “su fin”.
“E preparashonnan ta yegando su fin”, asina minister ukraniano di Defensa Oleksiy Reznikov a deklará, refiriendo na un kontra atake ku a plania vários luna pasá pa bolbe konkistá teritorionan okupá pa Rusia na ost i sùit di Ukrania.
Den oranan di mardugá, atakenan ruso a alkansá vários siudat ukraniano. Esaki ta e promé atake ku outoridatnan ta registrá desde komienso di mart.
E presidente ukraniano, Volodymyr Zelenky a kondená nan i primintí ku lo reakshoná riba e atakenan. E ministerio di Defensa ruso a informá ku Moscow a bombardiá “ophetivonan militar na Ukrania” ku armanan di presishon haltu.
Den e siudat ukraniano di Uman, kual tin 80.000 abitante, por lo ménos 23 persona inkluyendo un mucha a muri despues ku un misil a kai riba un edifisio di kas, segun e gobernador regional Igor Taburets.
E atake a wòrdu lansá alrededor di 4 or di mainta, desde avionnan ruso stratégiko Tu-95 situá den zona di laman Caspio.
