BOGOTA, COLOMBIA, AFP.- E gobièrnu di Colombia i gèngnan den siudat di Medellín lo kuminsá ku diálogonan otro siman pa desarmá 12.000 hòmber, segun indikashon di e konsehero presidensial di pas.
“Awe nos ke kompartí e kompromiso públiko” di e gèngnan pa dal stapnan den direkshon di “pas total”, segun indikashon di e komisario Danilo Rueda a informá.
Rueda a bishitá e prizòn di Itagui, un munisipio ku ta keda pafó di Medellín, kaminda tin kabesnan di gèngnan dediká na narkotráfiko, ekstorshon i robo entre otro delitonan.
Rueda no a spesifiká e fecha eksakto di e komienso di e negosiashonnan ni ki gruponan lo sinta na mesa, kaminda outoridatnan lokal, nashonal i representantenan di e sosiedat sivil lo partisipá, pero a afirmá ku lo ta otro siman.
E konsehero no a deskartá kombersashonnan ku e hefenan di gruponan prezu for di Colombia.
Komo gesto di pas, e gèngnan a deklará un “suspenshon di tur sorto di hostilidat, konfrontashon òf disputa”.
