LONDON, REINO UNI, AFP.- E promé minister britániko, Boris Johnson a wòrdu kritiká djárason, despues ku el a anunsiá ku lo habri tur zoológiko komo parti di e suavisashon pero e no por garantisá ku por habri skolnan bek.
Johnson ta wòrdu kritiká pa su strategia konfuso pa saka e pais for di lockdown, meskos ku el a wòrdu kritiká den mart pa su tardansa ku restrikshonnan anti coronavirus. Apesar di esaki Johnson a defendé e “logronan asombroso” ku el a hasi pa su pais.
Reino Uni ta e segundo pais ku mas morto kousa pa covid-19, ku 41.128 kaso konfirmá te ku djárason. Merka ta number un.
Algun skol básiko a kuminsá risibí alumno riba 1 di yüni, pero e mandatario a bisa ku no por habri mayoria skol manera a wòrdu plania pa sosodé e luna aki.
Johnson a anunsiá ku for di djaluna por habri zoológikonan i otro parkenan den aire liber, kual a kousa kritiká. Mayoria ta konfundí ku Johnson su lista di prioridat.