BOSTON, AP.- Boston a konmemorá e di sinku aniversario di eksploshonnan letal den e máratòn di e siudat ku rekordatorionan solèm i aktonan di karidat.
E alkalde demókrata Marty Walsh i e gobernador republikano Charlie Baker a laga kransnan di flor na e lugánan di Boston Street kaminda e eksploshonnan a mata tres persona i heridá mas di 260 persona riba 15 di aprel aña 2013.
Baker a laga un di e kransnan dilanti di Marathon Sports miéntras un banda di gaita tabata toka. Na un otro sitio, famianan di e víktimanan Martin Richards i Lu Lingzi a risibí konsuelo di Walsh, miéntras nan tabata pone un otro krans na e lugá di e segundo eksploshon, dilanti e restorant Atlantic Fish. Sentenar di persona a reuní den silensio pa opservá e seremonia.
Tantu Baker komo Walsh a papia ku e famianan i e sobrebibientenan den un seremonia privá den e Biblioteka Públiko di Boston.
Jane i Henry Richards, famianan di e víktima mas hóben, Martin Richards, i miembronan di e fundashon di e famia, tambe a dirigí palabra na e seremonia.
E di 122 edishon di e karera djaluna lo wòrdu realisá ku unidatnan fuerte di seguridat.
