RIO DE JANEIRO, BRASIL, AFP.- E kantidat di pashèntnan ku COVID-19 bou di 40 aña den kuido intensivo a superá e grupo di mayor di edat den Brasil luna pasá, segun indikashon di un investigadó djaluna.
E kantidat di personanan di 39 aña òf ménos ku ta drenta unidatnan di kuido intensivo ku COVID-19 a oumentá konsiderablemente den mart ku mas di 11.000 i kual ta 52,2% di e total, segun e Proyekto UCI. Na komienso di e pandemia e sifra aki tabata solamente 14,6% i entre sèptèmber i febrüari 45%.
Dòkter Ederlon Rezende, koordinador di e proyekto, un inisiativa di Asosiashon Brasilero di Medisina Intensivo (AMIB) a bisa ku vários faktor por ta kousando e oumento aki.
Mayoria pashèntnan riba 80 aña, kual a pasa di 13,6% pa 7,8% den kuido intensivo den Brasil den mart, ta vakuná. Un di dos faktor ta ku hóbennan ta mas vulnerabel pa kontraé e vírus, mirando ku nan mester sali for di kas pa traha òf pasó nan ta kere ku nan ta ménos vulnerabel.
Un faktor mas ta un variante di e vírus ku a originá den Brasil, konosí komo P1, kual segun ekspertonan ta parsialmente responsabel pa e kantidat haltu di morto di COVID-19 den e pais den mart.
