BEIJING, AP.- E Komishon Nashonal di Salú di China a reportá 39 kaso nobo di COVID-19, kual ta infekshonnan “importá” di personanan ku tabata den estranhero i ku a yega e pais resientemente.
Durante mas di un siman, mayoria kaso reportá na China kontinental a wòrdu detektá den personanan ku ta yega di otro paisnan. E infekshon den e nashon mes a baha, segun indikashon di e Komishon.
E gobièrnu chines a duna un òrdu di karentena pa tur esnan ku subi e teritorio ku e ophetivo di evitá ku e vírus ta bolbe surgi. E vírus a paresé pa promé biaha na fin di aña pasá den e region sentral di e pais.
Desde djaluna, tur buelo pa Beijing lo wòrdu desviá pa un di e 12 aeropuertonan den e otro siudatnan di China. E pasaheronan mester hasi un inspekshon di salú tambe promé ku nan bishitá e kapital. Aparte di esaki, tur ku yega mester keda den karentena durante 14 dia den un hotèl, kubriendo nan propio gastunan.