BOGOTA, COLOMBIA, AFP.- Colombia a antisipá ku su kampaña di vakunashon lo kuminsá riba 17 di febrüari, tres dia promé ku loke a plania inisialmente, despues ku e pais a haña un promé karga di 50.000 vakuna.
“Awe ta un dia spesial pa nos pais, e proseso di vakunashon lo kuminsá otro mañan”, asina presidente Ivan Duque a bisa den su programa di televishon diario.
E karga, ku vakunanan di e laboratorio merikano Pfizer i esun aleman BioNTech a yega Bogotá den un buelo di Bèlgika, segun informashon di mandatario desde aeropuerto internashonal El Dorado.
E pais ta spera di por lansa su programa di vakunashon i vakuna “un mion kolombiano” den e promé luna Segun Duque.
E promé personanan ku lo haña e vakuna lo ta trahadónan di e sektor di salú den Sincelejo i Monteria, na nortost di Colombia. Djaweps lo inkluí siudatnan prinsipal manera Bogotá, Medellín i Cali.
Gobièrnu ta spera ku e promé karga ta keda distribuí di forma igual den tur departamento di e pais, konforme e kantidat di habitantenan i entre esnan mas vulnerabel.
E plan di gobièrnu ta pa kuminsá ku vakunashon di esnan riba 80 aña i esnan ku ta traha den e sektor di salú, kuminsando ku dòkter i enfermeronan.
