BOGOTA, AP.- Un polis a muri i sinku mas a resultá heridá den tres atentado den diferente region na sùitost di Colombia supuestamente ehekutá pa desendientenan di Forsa Armá Revolushonario di Colombia. Motersaikelnan kargá ku eksplosivo a eksplotá.
E gobernador di departamento di Cauca, Oscar Campo, a lamentá e atentadonan simultáneo den un diálogo ku periodistanan. “Nos ta spera un pronto rekuperashon di vários polis ku a resultá heridá den e pueblo di Padilla i Suarez. Tin akshonnan tumando lugá pa atendé ku esnan responsabel di e akto kontra un sentral di polis. Nos no ta laga terorismo poderá di e teritorio di Cauca”.
Ocampo a señalá ku investigashonnan ta señalá ku e outornan ta desendientenan di FARC.
E tres echonan a pasa djaluna anochi na momentu ku deskonosínan a bandoná tres motersaikel ku eksplosivo dilanti e sentralnan di polis. E tipo di eksplosivo ku a wòrdu usá no a wòrdu dibulgá.
E atakenan a pasa un dia promé ku e presidente nobo Ivan Duque a asumí su puesto komo mandatario di e pais. Esaki lo ta pa un periodo di kuater aña.
