DETROIT, AP.- E sistema outo piloto di Tesla no ta funshoná adekuadamente i por ta un riesgo pa seguridat di e shofùrnan, segun pruebanan realisá pa e revista Consumer Reports.
E publikashon i su wèpsait a tèst e modo “Outo piloto” i a haña esaki ménos kompetente ku sernan humano dor ku esaki ta ‘haal in’ outonan sin laga sufisiente espasio.
E direktor di Outo Testing, Jake Fisher, a bisa den un komunikado djárason ku e sistema no ta reakshoná riba lusnan di brek ni richtingaanwijzer i no por antisipá kiko e otro shofùrnan kier hasi.
Consumer Reports a bisa ku e fabrikante di outo mester presentá evidensia bálido di e sistema di seguridat nobo, promé ku nan haña pèrmit pa transitá riba kaya públiko.
E pruebanan ta generá mas pregunta tokante seguridat di e sistema di outo piloto di Tesla i tokante e afirmashon di direktor general Elon Musk indikando ku Tesla lo tin outonan kompletamente outónomo pa otro aña.
E Hunta Nashonal di Seguridat i Transporte di Merka a bisa siman pasá ku e outo piloto tabata aktivá durante un aksidente den mart, kaminda un hòmber di Florida a muri. Ni e shofùr ni e sistema no a para pa un trailer dilanti di e Tesla, kual kier a bira na man robes. Un otro shofùr a muri na aña 2016 den un aksidente similar.
