MADRID, AP.- Persona ku ta oponé kontra korida di toro a konfrontá ku residentenan den un pueblo na Spaña djamars den un festival tradishonal. Akinan pa promé biaha a prohibí sakrifisio di animal.
Polis a intervení miéntras algun shen persona tabata kore huntu ku un toro solitario den lokalidat di Tordesillas, 200 kilometer na nortwèst di Madrid.
Un muhé no identifiká ku tabata protestá kontra e festival a bisa na periodistanan ku el a wòrdu gòlpiá dos biaha den lomba ku un garoti pa un di e partidarionan di e evento. Prensa lokal a reportá ku tabatin algun bringamentu.
Ta un tradishon ku hòmbernan riba kabai i riba pia ta persiguí un toro riba kampo i den mondinan promé ku nan sakrifiká e animal riba un kampo dilanti míles di persona. Esaki ta un di e espektákulonan mas sangriento di Spaña. Toreronan ta bisa ku e tradishon ta data di siglo XIV. Pero promé ku protestanan kresiente di defensornan di animal, aña pasá gobièrnu regional a prohibí pa sakrifiká toronan den fiesta di Tordesillas, ounke koridanan riba plasanan tradishonal no a keda afektá.
Un presensia polisial fuerte a sigurá ku e toro no a keda sakrifiká djamars, miéntras ku un áwaseru fuerte e interumpí e evento.
