WASHINGTON, AP.- E demókratanan liberal a revelá un proposishon di lei pa purba abolí e Servisio di Kontròl di Inmigrashon i Duana di Merka.
E presidente di Kámara di Representante, e republikano Paul Ryan, a burla di e proposishon presentá djaweps atardi, afirmando ku esaki ta dun’é un bon “sintimentu” pa ku elekshonnan di novèmber.
E diferente puntonan di bista riba e posibel impakto di e proposishon ta e ehèmpel mas resien di e importansia di e tema di inmigrashon pa próksimo elekshonnan di mitar mandato presidensial, kaminda e demókratanan ta spera di kita kontròl di e republikanonan di Kámara di Representante i probablemente Senado,
No ta parse ku e inkietut públiko riba e tema ta bai disminuí pronto, den un konteksto ku e gobièrnu di presidente Donald Trump ta pasando den algun momentu difísil pa reuní mas di 2.000 mucha migrante ku a wòrdu separá di nan mayornan. Esaki debí ku e mayornan a drenta ilegalmente den Merka despues di krusa frontera ku Mexico.
E proposishon di eliminá ICE no tin chèns di yega niun kaminda den Kámara di Representante, pues e ta wòrdu kontrolá pa e republikanonan.
Pa e aktivistanan demókrata liberal, e agensia di kontròl a kombertí den un símbolo di aplikashon agresivo di leinan migratorio di parti di Trump i dor di eliminando esaki lo kombertí e tema den esun mas prinsipal di e kampaña.
